ದಿ. ಚಂದು ಪೂಜಾರಿ ಸ್ಮಾರಕ ಪ್ರಶಸ್ತಿ ಪ್ರದಾನ
ಲೇಖಕರು : ಸತೀಶ್ ನಾಯಕ್ , ಪಕಳಕು೦ಜ
ಗುರುವಾರ, ನವ೦ಬರ್ 21 , 2013
|
|
ನವ೦ಬರ್ 21 , 2013
|
ದಿ. ಚಂದು ಪೂಜಾರಿ ಸ್ಮಾರಕ ಪ್ರಶಸ್ತಿ ಪ್ರದಾನ
ಕೋಟ :
ಕರಾವಳಿಯ ಅಸಂಖ್ಯಾತ ಗರಡಿಗಳಲ್ಲಿ ಯಕ್ಷಗಾನ ಮೇಳ ನಡೆಸುತ್ತಿರುವ ಏಕೈಕ ಗರಡಿ ಗೋಳಿಗರಡಿಯಾಗಿದ್ದು, ಮೇಳವು ಉತ್ತಮ ಆಡಳಿತ ವ್ಯವಸ್ಥೆಯಿಂದ ಯಶಸ್ಸು ಸಾಧಿಸುತ್ತಿದೆ. ಯಕ್ಷಗಾನ ಕ್ಷೇತ್ರವನ್ನು ವ್ಯಾವಹಾರಿಕ ದೃಷ್ಟಿಕೋನದಿಂದ ಮುನ್ನಡೆಸುವ ಪರಿಸ್ಥಿತಿ ಇಂದು ದೂರವಾಗಿದೆ. ಕಲಾವಿದರು ಮೇಳದ ಮುಖ್ಯಸ್ಥರೊಂದಿಗೆ ಉತ್ತಮ ಬಾಂಧವ್ಯ ಹೊಂದುವ ಅಗತ್ಯವಿದೆ ಎಂದು ಮಣಿಪಾಲ ಎಂಐಟಿ ಕಾಲೇಜಿನ ಪ್ರಾಧ್ಯಾಪಕ ಎಸ್.ವಿ. ಉದಯ್‌ಕುಮಾರ ಶೆಟ್ಟಿ ಹೇಳಿದರು.
ಸಾಸ್ತಾನ ಗೋಳಿಗರಡಿ ಶ್ರೀ ಪಂಜುರ್ಲಿ ಕೃಪಾಪೋಷಿತ ಯಕ್ಷಗಾನ ಮಂಡಳಿಯ ಪ್ರಥಮ ದೇವರ ಸೇವೆಯಾಟ ಹಾಗೂ ದಿ. ಚಂದು ಪೂಜಾರಿ ಸ್ಮಾರಕ ಪ್ರಶಸ್ತಿ ಪ್ರದಾನ ಸಮಾರಂಭದಲ್ಲಿ ಮಾತನಾಡಿದರು. ಪ್ರಶಸ್ತಿ ಸ್ವೀಕರಿಸಿದ ಹಿರಿಯ ಯಕ್ಷಗಾನ ಕಲಾವಿದ ಅರಳಗೋಡು ಮಾಧವ ನಾಯ್ಕ ಮಾತನಾಡಿ, ಯಕ್ಷಗಾನ ಕ್ಷೇತ್ರಕ್ಕೆ ಉಡುಪಿ ಜಿಲ್ಲೆಯ ಪ್ರೇಕ್ಷಕರ, ಕಲಾಪೋಷಕರ ಕೊಡುಗೆ ಅಪಾರವಾಗಿದೆ. ಉತ್ತರ ಕನ್ನಡ ಮೂಲದ ಅನೇಕ ಕಲಾವಿದರಿಗೆ ಕಲೆಯ ಮೂಲಕ ಮರುಜನ್ಮ ನೀಡಿದ ಊರು ದಕ್ಷಿಣ ಕನ್ನಡ ಮತ್ತು ಉಡುಪಿ ಜಿಲ್ಲೆ ಎಂದರು.
ಶ್ರೀಕ್ಷೇತ್ರ ಗೋಳಿಗರಡಿಯ ಆಡಳಿತ ಮೊಕ್ತೇಸರ ಕೃಷ್ಣಯ್ಯ ಹೆಗ್ಡೆ ಅಧ್ಯಕ್ಷತೆ ವಹಿಸಿದ್ದರು. ಮೇಳದ ಪ್ರೋತ್ಸಾಹಕ ಬಸವರಾಜ್, ಆಡಳಿತ ಮೊಕ್ತೇಸರ ಡಾ. ಕೃಷ್ಣಪ್ರಸಾದ ಶೆಟ್ಟಿ, ಮೇಳದ ಅಧ್ಯಕ್ಷ ವಿಠಲ ಪೂಜಾರಿ, ಗರಡಿಪಾತ್ರಿ ಶಂಕರ್ ಪೂಜಾರಿ, ಯಕ್ಷಗಾನ ಕಲಾವಿದ ಐರೋಡಿ ಗೋವಿಂದಪ್ಪ, ಉಡುಪಿ ತಾಪಂ ಮಾಜಿ ಉಪಾಧ್ಯಕ್ಷ ರಾಜಾರಾಮ, ಮನೋಜ್ ಕುಮಾರ್ ಉಪಸ್ಥಿತರಿದ್ದರು.
ಈ ಸಂದರ್ಭ ಮೇಳಕ್ಕೆ ಗಣಪತಿ ಮೂರ್ತಿಯನ್ನು ಕೊಡುಗೆಯಾಗಿ ನೀಡಿದ ಕುಂಭಾಶಿ ಹೊಳೆಕಟ್ಟು ಸಂತೋಷ ಪೂಜಾರಿ ಇವರನ್ನು ಗೌರವಿಸಲಾಯಿತು. ಉದ್ಯಮಿ ಬಳ್ಕೂರು ಗೋಪಾಲ ಆಚಾರ್ಯರು ಮೇಳದ ಎಲ್ಲ ಕಲಾವಿದರಿಗೆ ಚಿನ್ನದ ನಾಣ್ಯವನ್ನು ನೀಡಿ ಗೌರವಿಸಿದರು. ಮೇಳದ ಗೌರವಾಧ್ಯಕ್ಷ ದೇವಾನಂದ ಸ್ವಾಗತಿಸಿದರು. ಕೇಶವ್ ಆಚಾರ್ ಪ್ರಶಸ್ತಿ ಪತ್ರ ವಾಚಿಸಿದರು, ಮೇಳದ ಕಾರ್ಯದರ್ಶಿ ಗಣೇಶ ಪೂಜಾರಿ ಕಾರ್ಯಕ್ರಮ ನಿರೂಪಿಸಿದರು.
|
|
|
